அம்மா மாதிரி வாடா

கொஞ்ச நேரம் முன்ன மத்யமர்ல சந்திரமௌலீஸ்வரன் விஸ்வநாதன் என்பவர் ராகு-கேது மேஷம்-துலாம் ராசியில் இப்ப சஞ்சரிப்பதன் பலன் சொல்லியிருக்கார் (மார்ச் 10 2023). இவர் பெயரை முன்பு அப்து பதிவில் பார்த்திருக்கேன். இப்போது தான் மார்க்கான் இவர் போஸ்ட்டுகளை முன்னாடி கொண்டு வர்றான்.

அம்மிணி மேஷம், ராசியில ராகு, என் ராசியில இப்ப கேது குத்துக்கல்லாட்டம் உட்கார்ந்திருக்கார். எங்க இரண்டு பேர் ராசிக்கும் இடையில தான் மத்த கிரகங்கள் கடந்த ஒரு வருடமாக இருந்துச்சு.

மத்யமர் போஸ்ட்ல அவர் எழுதியிருக்கிற மாதிரி தான் அம்மிணி தூள் கிளப்புறாப்புல. அந்த தைரியம் சக்தி வீராப்பு கொஞ்சம் நமக்கு இருந்தா நல்லாயிருக்கும்ன்னு நினைப்பேன்.

என்னை விட பையன் அவன் அம்மா மாதிரி எல்லா குணங்களும் பெற்று இருக்கக் கூடாதான்னு நினைப்பேன். ஆனால் அவன் என்னை மாதிரி, எல்லா குணத்திலும். தடங்கல் கஷ்டங்கள் எல்லாத்தையும் இப்பவே அநுபவிக்கறான்.

அவன்ட்ட எப்போதும் சொல்வேன்: அம்மா தான் நம்பர் ஒன், அதுக்கப்புறம் தான் நானெல்லாம் என்பேன். ஆனால் அவன் என் கிட்டத் தான் எல்லாத்துக்கும் முதல்ல வருவான். முதல்ல அம்மாட்ட கொடுத்துட்டு அப்புறம் என்கிட்ட வான்னு அனுப்பிருவேன் அவனை.

படிப்புல வேலையில அம்மா மாதிரி இருடா அப்ப தான் அம்மா மாதிரி மேலேப் போலாம்டான்னா அவன் பாதையே தனி. என் மாதிரியே தனி வழி.

அவன் சொல்றான்: அப்பா இந்த ஜர்னல்ல படிச்சேன். மிக கஷ்டமான ஆபத்தான நிலமையில ஒருத்தன் அவதிப்படும் போது கூட அமைதியாக இருக்கான்னா அதற்கு காரணம் அவன் ஜீன்கிட்டேர்ந்த வந்த காரணமாக இருக்கும்ன்னு போட்டிருக்கு. என் வேலையில அவ்வளவு மோசமானதைப் பார்த்திருக்கேன் dad. அப்ப என் கூட வேலை செய்யறவன்ட்ட இருக்கிற சலசலப்பு என் கிட்ட இல்லாம அமைதியாக situationஐ ஹேண்டில் பண்ண முடியுதுப்பா. அது எங்கேர்ந்து வந்திருக்குன்னு நான் சொல்ல மாட்டேன், கண்டிப்பாக அம்மாட்டேர்ந்து இல்லைங்கிறான்.

நம்ம குணம் அப்படியே அவன்ட்ட இறங்கியிருக்கு. படற கஷ்டங்களைப் பட்டு பக்குவமாயிடுச்சு எனக்கு, அதில் கிடைத்த படிப்பினைகளே ஒவ்வொன்றையும் அமைதியாக ஹேண்டில் பண்ண உதவுகிறது. அவனும் இப்ப என்னைப் போலவே பல கஷ்டங்கள் பட்டு பக்குவப்பட்டு வர்றான்.

அம்மா மாதிரி குணம் மற்றும் படிப்பு வந்தால் அம்மிணி போல் சிறப்பாக மேலே வர முடியும். அவன்ட்ட அதையே சொல்லி வருகிறேன்: அம்மா மாதிரி வாடான்னு.

அவரவர் கையில் தானிருக்கு.

நண்பனைப் போல் உரையாடும் மகனுடன்

வாழ்வினிது

ओलै सिरिय ।

¡Mi hijo es mi amigo!

ஸ்பானிஷ் கற்கும் பொழுதில் - 21

சின்ன வயசுல நாலு பக்கம் எழுத தரையில எங்க வேணா உட்கார்ந்து உருண்டு புரண்டு எழுத முடிஞ்சுச்சு.

இப்ப போன வாரம் சர்ச் கிளாஸ்ல நடந்த பாடத்தை ஸ்பானிஷ்ல எழுதிப் பழகலாம்ன்னா, தரையில உட்கார்ந்து எழுத முடியலை, சோஃபால உட்கார்ந்து எழுத முடியலை. ஒரு பக்கம் எழுத ஒரு மணிநேரமாவுது.

உடம்பு ஒரு அகலமான மேஜை நாற்காலியைத் தேடுது. வயசான காலத்துல பள்ளிக்கூடம் போனா படிக்கிறது எழுதறதுக்கு கூட உடம்பு உதவ மாட்டேங்குது. மனசு என்னமோ இன்னும் சின்னபுள்ளையாட்டம் படி படி எழுதுங்குது. இதற்காக ஒரு இடம் தேடனும்.

இளமையில் கல் முதுமையில் கல்

வாழ்வினிது

ओलै सिरिय ।

¡No puedo sentarme en el suelo y escribir!

நல்ல காலம் பிறக்கிறது வாழ்வில்

சின்ன வயசுலேர்ந்தே ஏழ்மையை எங்கள் வீட்டில் பார்க்கலைன்னாலும் அதிகம் எதற்கும் செலவு பண்ணமுடியாத ஒரு சிக்கனமான வாழ்க்கையையே பார்த்து வளர்ந்தாச்சு! 

மேலும் அப்பா அம்மா இருவரும் தனக்குன்னு எதுவும் காஸ்ட்லியாக வாங்காம, கடனடைப்பதும், நீண்டகால வாழ்விற்கு சேமிப்பதற்காக மாதா மாதம் வர்ற சம்பளத்துக்கே மாதக்கடைசியில் பட்ஜெட் போட்டே வாழ்க்கையை நடத்தியதால் அதைப் பார்த்து வளர்ந்த எனக்கு, எனக்குன்னு எதுவும் செலவு பண்ண மனசு வருவதில்லை. 

அப்பாவைப் போல நீண்ட வாழ்க்கைக்கு தேவைப்பட்டால் என்ன செய்யன்னு ரொம்பவே சிக்கனமாக வாழ்ந்து ரிடையர்மெண்ட்டுக்கும் சேமித்து வைத்தே வாழ்ந்து வந்துவிட்டேன். பேண்ட் ஷர்ட் வாங்கனும்ன்னா கூட 10-25$க்கு மேலே செலவு பண்ணமாட்டேன், அம்புட்டு கஞ்சம், வீட்டுக்கடனை அடைச்சு ஒரு கடனற்ற வாழ்வு வாழனும்ன்னு குறிக்கோள், ரிடையர்மெண்ட்க்காக சேவிங் என கையை குறுக்கி வாழ்ந்தே பழகிடுச்சு.

வெறும் கழுத்தோடயே எப்போதுமிருக்கேனேன்னு பதினைந்து வருடம் முன் 500$க்கு ஒரு செயின் வாங்கினேன். அதுதான் எனக்குன்னு வாங்கியது. மற்றது ஒன்னு சேவிங்கிற்காக வாங்கினேன், அதை அம்மிணி கொண்டு போய் பேங்க் லாக்கர்ல வச்சது தான், இதுவரை கண்ணுல காட்டல. 12 வருடம் ஓடிவிட்டது. அம்மிணியோட பேங்க் லாக்கர் எப்படி ஓபன் பண்ணனும்ன்னு கூட தெரியாது.

போன மாதம் அம்மிணி சொன்னாப்புல அவங்க நண்பி மிகவும் வயதானதால அவங்க புடவை நகை எல்லாத்தையும் விற்கறாங்க, வாங்க போலாம். உங்களுக்கு ருத்ராக்ஷம்ன்னா அவ்வளவு பிடிக்குமே, அவங்க அதை எனக்கு விற்கறேங்கிறாங்க, வாங்க போலாம்ன்னு இழுத்துகிட்டு போனாப்புல.

அந்த வயதான தம்பதியரில் மாமிக்கு 83 வயது, மாமா 87 வயது கேன்சர் வேற. நடக்க முடியாம நடக்கிறார். அவங்க வாங்கினது எல்லாம் 30-35 வருடம் முன்பு, ஆனால் தங்கத்தை இன்றைய விலைக்குத் தான் கொடுப்பேன்னுட்டாங்க!

அம்மிணி அந்த மாமியோட ருத்ராக்ஷ மாலையை இன்றைய விலையில் வாங்கிகிட்டாப்புல. 

மாமா என் கழுத்தைப் பார்த்தார். கழுத்துல என்ன போட்டிருக்க காமின்னார், அதைக் கழட்டிக் கொடுன்னார். அதை தொட்டுப் பார்த்தவர் நேரா எழுந்து தடுமாறி நடந்துகிட்டே போய் அவரோட ருத்ராக்ஷ ஸ்படிக மாலையை கொண்டு வந்து கொடுத்து நீ இதை வாங்கிக்கிறன்னு சொல்லி கையில கொடுத்துட்டார்.

மாமா ஒரு சிறந்த வியாபாரி பிசினஸ்மேனாம். 35 வருடம் முன் லிபியாவில் தான் நேரில் தங்கம் வாங்கி, நேபாளில் ருத்ராக்ஷம் வாங்கி, ஸ்படிகம் வேறொரு நாட்டில் வாங்கி தனக்குத் தெரிந்த ஒரு பெரிய ஆளை வைத்து செய்த மாலை. 

நீ தான் இதை எடுத்துக்கிற இந்தா பிடின்னு கையில கொடுத்துட்டார். தங்கம் இன்றைய விலைக்கு அது மிகப்பெரிய தொகை வேற. நான் அவர்ட்ட எவ்வளவோ சொல்லிப் பார்த்தேன்: இது உங்க சந்ததிக்குப் போக வேண்டியது, அவங்களுக்கு கொடுங்கன்னு எவ்வளவோ சொல்லியும் கேட்கலை. அவங்க இங்க பிறந்த வளர்ந்தவங்க, வேல்யூ தெரியாது, டாக்டர் வேற, அவங்களுக்கு இதைப்பற்றி ஒன்றும் தெரியாது, தெரிந்தவங்களுக்குத் தான் கொடுக்கனும்ன்னு கையில கொடுத்துட்டார். அதிக தொகை, அவங்க சொன்னதை அப்படியே அவங்க கண்முன்னே பேங்க் ட்ரான்ஸ்பர் பண்ணிட்டேன். மாமா தன் தள்ளாமையிலும் கம்ப்யூட்டர் ஆன் பண்ணி பேங்குல பணம் வந்துடுச்சான்னு செக் பண்ணிட்டு தான் கொடுத்தார். மாமி சொல்றாங்க அவர் பிசினஸ்மேன், எல்லாத்திலும் அது சரியாக இருக்கான்னு அவருக்கு இப்பவும் 86 வயசில் தெரியனும்கிறாங்க.

நீ ருத்ரம் சொல்வேன்னு சொன்னா உண்மையான்னு கேட்டார், ஆமாம்ன்னேன். அவருக்கு ஒரு கை சரியா வேலை செய்யலை. என்னை வீட்டுள்ளே கூட்டிப் போய், அவரோட டேபுள் ட்ராயரைத் திறக்கச் சொல்லி ஒரு டப்பா எடுக்கச் சொல்லி இது என்ன தெரியுமா இது உனக்குத் தான் எடுத்துட்டுப்போன்னு கையில கொடுத்துட்டார். 

உண்மையிலேயே அரண்டு போயிட்டேன். ஐயோ இது உங்க சந்ததிக்கு போக வேண்டியது அவங்களுக்கு கொடுங்கன்னா, அவங்களுக்கு இதைப்பத்தி ஒன்னுமே தெரியாது. ஶ்ரீருத்ரம் சொல்ற உங்கிட்ட தர்றதை விட யாருக்கு கொடுப்பது. என் அண்ணாக்கு இரண்டு கொடுத்துட்டேன். ஒன்னு இப்ப ஓபனாகி இருக்கு, இன்னொன்னு கொஞ்ச நாளில் ஓபனாகும்கிறார். அரண்டு போய் நிற்கிறேன் அங்கே!

அந்த சாலிக்கிராமத்தைத் திறந்தா உள்ளே ஶ்ரீசக்ரமிருக்கு. இன்னொன்னும் கொஞ்ச வருஷத்துல ஓபனாகும்கிறார். அவர்ட்ட எவ்வளவோ கெஞ்சினேன்: மாமா இது உங்க குடும்பத்துக்குப் போகனும் எனக்குத் தர்றாதீங்கன்னு சொன்னா கேட்கலை அவர்.

உன் வயசென்னன்னு கேட்டார். 58ன்னேன். அடுத்த மறுவிநாடி அவர் சொன்னார்: உனக்கு இன்னும் பத்து வருஷம் தான் லைஃப், இனி ஆபீஸில் உன் மேனேஜர் பக்கெட்டைத் தூக்குன்னு சொன்னா தூக்கு, அவன் சின்னவன் அது இதெல்லாம் யோசிக்கக் கூடாது, அவன் அந்த பக்கெட்டை கீழே வையுன்னு சொல்றவரை அதை கீழே வைக்காதே, ரிடையர் ஆகனும்ன்னு யோசிக்காதேங்கிறார்.

அரண்டு போய் நின்னுட்டேன். நம் மனசுல ஓடற ஒவ்வொன்னையும் புட்டுபுட்டு வைக்கிறார். எதை நினைக்கிறோமோ அதை செய்யாதேங்கிறார். ஆடிப்போச்சு. எப்படி இவருக்கு என் மனசுல ஓடறது தெரியுதுன்னு புரியாம உட்கார்ந்திருந்தேன். அவர் சொன்ன அத்தனையும் உண்மை வேற. எப்படி அவருக்கு தெரிந்ததுன்னு தெரியலை.

ரொம்ப கம்பெல் பண்ணி கொடுத்ததால் அவர்கள் காலில் விழுந்து வாங்கிகிட்டேன். 

நேராக சிவன் கோவில் போய் ஸ்வாமி காலில் வைத்துவிட்டு அர்ச்சகரை அங்கேயே பூஜை செய்யச் சொல்லி வீட்டுற்கு எடுத்து வந்தேன்.

இந்த ஜனவரிக்கு மேலே நல்லது நடக்கும்ன்னு போட்டிருந்துச்சு. கஷ்டங்கள் விலக ஆரம்பித்திருக்கு. நல்லது தானாக நடக்குது!

வாழ்வினிது

ओलै सिरिय ।

¡Luz en el túnel!

பிள்ளைக்கு 16 வயதில் வாகனம் தேவை

நம் பிள்ளைகள் ஆணோ பெண்ணோ இங்கு high school போகும் போது அங்கு ஸ்கூலில் உடனடியாக ட்ரைவர் education programல சேர்த்து விட்டுருங்க, அவங்க 16 வயசாகும் போது ட்ரைவிங் லைசன்ஸ் கிடைக்க உதவும். அது நம் குழந்தைகளுக்கு ரொம்ப நல்லது, அவங்க வளர்ச்சிக்கு மிகவும் உதவும்ன்னு இங்கு கடந்து ஆறேழு வருடங்களாக பல பெற்றோர்களுக்கு நேரில் சொல்லி வருகிறேன்.

ஒவ்வொருவரும் ஒவ்வொரு கதை சொல்வார்கள்: இன்சூரன்ஸ் கன்னாபின்னாவென்று ஏறிவிடும், குழந்தைகளை கன்ட்ரோல் பண்ண முடியாது, படிப்பு போயிரும், கார் போயிடும், ஆக்ஸிடண்ட் ஆச்சுன்னா, என, ஒரு பெரிய லிஸ்ட் சொல்வார்கள்.

என் பதில் அவர்களுக்கு இதான்: நீங்கள் சொல்ற காரணம் எதுவும் சரியில்லை, காரணம் அதுவில்லை, உங்கள் குழந்தைங்க வளர்ச்சிக்கு நீங்க தடையாக இருக்கீங்கன்னு நேரடியாகவே அவர்களை குற்றம் சொல்வேன். யு ஆர் ராங் இன் எவரிதிங் சார் என்பது தான் என் பதில் அவர்களுக்கு.

என் பையன் அநுபவத்தில் சொல்வது தான். அவன் இவ்வாறு பெற்றோர்கள் செய்வதால் அவனோட பள்ளி நண்பர்கள் படும் கஷ்டங்களைச் சொல்வான். கூடவே நமக்கு ஒரு கேள்வி வேற: why you parents are always wrong? This is a different country, understand ம்பான். அவன் சொல்வது சரி தான். உனக்கு நான் என்னோட காரை தியாகம் பண்ணேன்னு ரொம்ப ஆடாதே, எல்லோர் குடும்பமும் ஒரே மாதிரி அல்லன்னு சொல்லி வைப்பேன். 

இருப்பினும் யதார்த்தம் அவன் சொல்வது தான். பசங்க பள்ளியில் படிக்கும் போது நாம் அவர்கள் நண்பர்களாகத் தான் பழகனும், பெற்றோர்களாக மட்டுமேயல்ல.

இதை குறிப்பிடுவதற்கு காரணம்: நேற்று விழாவில் ஒருவர் என்னிடம் வந்து பேசினார். அவர் பையன் இப்ப கல்லூரியில். நீங்க ஐந்து வருடம் முன்ன சொன்ன மாதிரி என் பையனுக்கு உண்மையிலேயே நீங்க சொன்ன அதே ப்ரோக்ராம்ல சேர்த்து விட்டு உடனே காரும் கொடுத்தேன். அது எங்களுக்கு எவ்வளவு உதவியதுன்னு நிறையவே சொல்லலாம். இப்ப எங்க லைஃப் ரொம்ப ஈசியாக இருக்கு, அவனோட தேவைகளை ஈசியாக அவனே செய்து கொள்கிறான். இப்ப காலேஜ்லேர்ந்து வாரா வாரம் வந்து ஓரிரு நாளைக்கு சாப்பாடு கூட எடுத்துப் போறான். உண்மையிலேயே சந்தோஷமாக இருக்கு, நன்றின்னார்.

நான் எப்போதும் என் வாழ்க்கையில் வாங்கிய அடிஉதைகளை மற்றவர்களுக்குப் பாடமாக சொல்வது, அவர்களுக்கும் உதவுது. அவர்கள் தட்டிக்கழிக்க முன்பு கூறிய காரணங்கள் எதுவும் நிற்காது என்பது அவர்களே உணர்கிறார்கள். இவரிடம் நான் எப்போது லெக்சர் அடிச்சேன்னு தெரியலை, ஆனால் அந்தக் குழந்தைக்கு உதவியிருக்கு. இவர் அப்போது நான் சொன்னதை எதுவும் மறுத்தும் பேசியதாக ஞாபகம் இல்லை, தன் பையனுக்கு உதவியிருக்கார். நன்று.

வாழ்வினிது

ओलै सिरिय ।

¡Entrena a tus hijos para que aprendan a conducir temprano. Les ayuda!

அசரீரி கேட்குது

என்ன தான் ஊர் உலகத்துல போய் எடுபுடி வேலை செய்தாலும் சொந்த வீட்டுல நாலு பாத்திரம் கூட விலக்கலைன்னா நாம்ப மனுசன்களே இல்லை.

10 தோசை சாப்பிட்டு முடிக்கிறதுக்குள்ள ஒரு சின்க் லோடு பாத்திரம் நிக்குது.

உண்ட மீசைக்கு இழுக்காயிரக்கூடாதேன்னு காயப்போடாம அமைதியாக டிஷ் லோடு பண்ணி சின்க்கை க்ளீன் பண்ணிட்டேன்.

காலையில காபி போடற கை சின்க்கைப் பார்த்து முகம் சுளிக்காம இருக்கும்.

முதுகு வலிக்குது. இன்றைய தினம் கழிந்தது. விடியலை நோக்கி உறங்குவோம்.

அம்மாவின் குரல் கேட்குது: நாள் பூரா ஒருத்தி ஆபீஸ்லையும் உழைச்சுட்டு வீட்டுக்கு வந்தும் இவ்வளவு வேலை செய்யறா, உனக்கு 4 பாத்திரம் தேய்க்க இவ்வளவு நடிப்பாடான்னு.

சரி. நீ சொல்றது கேட்குது தாயீ!

வாழ்வினிது

ओलै सिरिय ।

¡La voz de mamá está oyendo!

மொழிச்சிதைவு

இன்றைய மார்ச் 7 2023 தமிழ் தினசரி காலண்டர்ல ‘கௌரவம்’ என்கிற வார்த்தையை ‘கவுரவும்’ன்னு அச்சடிச்சுருக்காங்க!

தமிழில் எழுதுவது அச்சடிப்பதெல்லாம் இந்த லட்சணத்துக்கு இறங்கி கௌரவம் இழந்துச்சுன்னா கண்டிப்பாக கவுர வேண்டிய நிலை ஏற்பட்டிடப் போவுது.

ஸ ஷ ஹ ஜ க்ஷ ஶ்ரீ யைத் தவிர்க்கனும்ன்னு ரொம்ப முயல்வது ஒரு மொழியின் உச்சரிப்பு, வழக்கம், அர்த்தம், மொழியின் பலத்தையும் இழந்து கவுர வேண்டிய நிலையில் தள்ளக்கூடிய நிலை உருவாகலாம்.

ஒவ்வொரு மொழிக்கும் அதன் அக்ஷரம் ஒரு ஆணி வேர்!

மொழிச் சிதைவு நடக்காமல் இருந்தால்

வாழ்வினிது

ओलै सिरिय ।

¡Nuestro idioma es muy querido para nosotros. ¡Escribe correctamente!!

ஸ்பானிஷ் கற்கும் பொழுதில் - 20

நான் இங்குள்ள சர்ச்சிற்குப் போய் ஸ்பானிஷ் பேசும் லத்தீன் அமெரிக்க மற்றும் சுர் அமெரிக்க மக்களோடு கலந்து பேசும் வாய்ப்பு எனக்கு கடந்த  எட்டு மாதங்களாகக் கிடைக்கிறது. அவர்கள் கல்வியில் எனது கற்பிதமும் தொடர ஒரு வாய்ப்பு எனக்கு.

அவர்களில் பெரும்பாலோர் வெனிசுலா, க்யூபா, Ecuador, கொலம்பியா, அர்ஜெண்டினா மற்றும் போர்ட்டோரிகோ தான். மெக்ஸிகன் மக்களை இங்கு பெரும்பாலும் பார்த்ததில்லை. ஒன்று இரண்டு தவிர.

ஏனென்று சந்தேகம் இருந்தாலும் அவர்களிடம் நேரிடையாக கேட்டதில்லை. அவர்களது உரையாடல்களிலிருந்து சிலவற்றை கணித்துள்ளேன்.

நான் இங்கு பார்த்த வரை மெக்ஸிகோ மக்கள் கடுமையான உழைப்பாளிகள். மிக குறைந்த கூலியில் பல கடுமையான வேலைகளையும் எளிதாகச் செய்யக் கூடிய உடல்திறன் மற்றும் மனத்திறன் உடையவர்கள். நம்மூர் பீகார் மக்களைப் போன்று. அதே சமயம் இந்த மெக்ஸிகோ கார்ட்டல்கள் மீதான அச்சம் கூட இவர்களைக் கொஞ்சம் வேறுபடுத்திக் காண்பிக்கிறது.

அது மட்டுமல்ல ஸ்பானிஷ் பேசும் பிற நாட்டு மக்கள் மெக்ஸிகன் மக்கள் பேசும் ஸ்பானிஷையும் பகடி செய்வதைப் பார்க்கிறேன். அதுவும் தன் குழந்தைகள் அந்த மெக்ஸிகன் பேசும் சில வார்த்தைகளை உச்சரித்து விட்டால் இந்த சுர் அமெரிக்கப் பிரதேச மக்கள் உண்மையிலேயே இழிவாகப் பார்க்கின்றனர். அரசியல் வேறுபாடுகளின் தொடர்ச்சியுமுண்டு இதில்.

நமக்கு தமிழில் ழ வின் உச்சரிப்பு எவ்வளவு முக்கியமோ அது மாதிரி எஸ்பானியோலில் (español) ñ வின் உச்சரிப்பு. இந்த ñ வை மட்டும் சரியாக உச்சரிக்காவிட்டால் பல வார்த்தைகளை கொலை பண்ணிருவோம். அதைக் கேட்கும் அவர்களுக்கு ஒரு அயர்ச்சி தோன்றுவது மட்டுமல்ல, உடனே நமது உச்சரிப்பை சரி செய்ய மிகவும் உதவுவர்.

நாம் எல்லோரும் போற்றும் ஜேசுதாஸ் கூட ஓரிரு பாடல்களில் ழ வை ள என உச்சரித்த போது நமது உள்ளத்தில் தோன்றிய ஒரு எள்ளல் மாதிரி அது. பிற்காலத்தில் நாம் உதித்நாராயண் பாடும் தமிழையே ஏற்றுக் கொள்ளத் தயாராகி விட்டோம். அது வேற கதை, நமது மன முதிர்ச்சி அது.

அவ்வாறே மெக்ஸிகன் மக்கள் பேசும் ஏஸ்பானியோலை மற்றவர்கள் வித்தியாசமாகப் பார்ப்பது. தனக்கேற்றவாறு பல வார்த்தைகளை வேறு விதமாக உச்சரிப்பதும் மற்ற வார்த்தையே புதிதாக உருவாக்கிப் பேசுவதும் கூட இவர்களிடம் ஒரு அயர்ச்சியைத் தோற்றுவிக்கறது.

மொழிகள் பலவானாலும் அதன் ஆணிவேர் அதன் அக்ஷரங்கள், வார்த்தைகள், உச்சரிப்புகள், இலக்கணம்,  மற்றும் காலத்துக்கேற்றவாறு தன்னை உருமாற்றிக்கொண்டு புது வார்த்தைகளை உருவாகுவதற்கு ஏற்ப வளைந்து கொடுக்கும் தன்மை ஆகியவையே ஒரு மொழி சிதையாமல் காணாமல் போகாமல் புதிய வளர்ச்சிப் பாதையில் தொடர முடியும்.

வாழ்வினிது

ओलै सिरिय ।

¡La belleza de los idiomas reside en sus letras, palabras y pronunciación!

அப்பனைப் போல் பிள்ளை

நான் கல்லூரியில் படிக்கும் போது மெஸ் சாப்பாடு சாப்பிடுவது கடினம். தரம் அப்படி. அது பல்வேறு மாநில மாணவர்களிருந்த மெஸ். ஆந்திராவிலிருந்து வந்த புரபசர் பருப்பு பொடி மற்றும் பலவகைப் பொடிகள் மற்றும் நெய் கொண்டு வந்து அந்த சாப்பாட்டையே ரசிக்க வச்சுருவார். எனக்கு ரொம்பவே கஷ்டம்.

மெஸ்ஸுக்கு மாசம் 700 கட்டினாலும், கூடப்படிச்ச நண்பர்கள் எதிர்த்தாப்புல இருந்த அந்த dhabaக்கு இழுத்துட்டுப் போயிடுவாங்க. அங்க மட்டர் பன்னீர் அல்லது பன்னீர் பட்டர் மசலா வச்சு காலத்தை நாங்க ஓட்டினோம். வேற வழியில்லை.

அப்ப ஸ்காலர்ஷிப் பணம் நிறைய வந்ததால் அது பெருசாத் தெரியலை. ஒரு ஸ்காலர்ஷிப் வாங்கி இரண்டு பேர் படிச்சோம் நானும் என் தம்பியும்.

இப்ப பையனோட க்ரெடிட் கார்ட் பில் கட்டும் போது என்னடா மெஸ்ஸுக்கு அவ்வளவு கட்டியிருக்கேன், எப்ப பார்த்தாலும் வெளிய சாப்பிடறன்னா, அந்த wrapஐயும் பிஸ்ஸாவையும் எப்படிப்பா தினமும் சாப்பிடறதுன்னு கேட்கிறான். வாழனுமில்லங்கிறான்.

அடேய் நான் அப்ப பண்ணினதை நீ இப்ப பண்ற, doordash சிஇஓவை இன்னும் பணக்காரனாக்குற நீ, உன் அப்பனை ஏழை ஆக்குறடான்னா, நான் அப்பனைப் போல் பையன் டாட் ங்கிறான்!

என்னத்தச் சொல்ல!

வாழ்வினிது

ओलै सिरिय ।

¡Como padre, su hijo!

ஸ்பானிஷ் கற்கும் பொழுதில் - 19

இப்பவெல்லாம் ஸ்பானிஷ் புரபசர் நடத்தும் சர்ச் வகுப்புகளுக்குப் போனால் அன்னிக்கு எந்த கிளாஸில் யாருக்கு உதவுவோம், ஆங்கில கிராமர்ல எதைப் பத்தி சொல்லித் தரனும்னு முன் கூட்டியே தெரிவதில்லை.

புரபசர் ஒரே நேரத்துல மூனு கிளாஸ் எடுக்கிறார். அவருக்கு உதவ குறைந்தது ஒவ்வொரு வகுப்புக்கும் என்னைப் போல் இரண்டு பேர் தேவைப்படுது.

இன்னிக்கு (மார்ச் 2) 5 மணிக்கே வந்துருன்னு நேற்றே தகவல் அனுப்பினாங்க. ஆபீஸ் வேலை முடிஞ்சு போய் சேர ஐந்தேமுக்காலாயிடுச்சு. முதலில் வரச்சொன்ன கிளாஸ் வேற, போனவுடன் வேற வகுப்புக்கு மாத்திட்டாங்க. 

அங்க போனால் நான் ஒருத்தன் தான். புரபசர் கிளாஸ் மொத்தத்தையும் என் கிட்ட கொடுத்து எடுக்கச் சொல்லிட்டுப் போயிட்டார். வந்த இரண்டு ஸ்டூண்ட்ல ஒருத்தர் வெனிசுயேலாலேர்ந்து வந்து ஆறு மாசம் தான் ஆவுது. படிச்சது ஐடி இஞ்சினியராம், இங்க நிரந்தர வேலையில்லாம ஒரு எடுபுடி வேலை. இன்னொருத்தர் Ecuador. 

ஸ்பானிஷ்ல அள்ளி கொட்டறாங்க, ஒன்னும் புரியல. வாயைப் பொளந்து பார்த்து கிட்டு இருந்த்தேன். ஆனால் செம ஸ்மார்ட். 

புரபசர் அவங்க என்ன பண்ணனும்னனு வெள்ளை போர்டில் ஒரு பெரிய paragraphஐ ஸ்பானிஷில் எழுதி தள்ளிட்டுப் போயிட்டாங்க. முதலில் நான் படிச்சுட்டு அது ஏதோன்னு நினைச்சு விட்டுட்டேன். வந்த ஸ்டூடண்ட் அதைப் படிச்சுட்டு கடகடன்னு அதில் சொன்ன மாதிரி அசைன்மண்ட் வொர்க் எடுத்துகிட்டு வேலை செய்ய தயாராகிட்டாங்க.

அட அப்படி என்னடா இருக்குன்னு இரண்டாவது தடவை மெதுவாப் படிச்சுவுடனே எனக்குப் புரிஞ்சுது. போர்ட்ல என் பேரை வேற எழுதியிருக்காங்க. அட இவ்வளவு சிம்பிளா எழுதியிருக்காங்க, para பெருசா இருக்குன்னு முதலில் சரியாப் படிக்கலையேன்னு வருத்தமாயிடுச்சு.

நல்லவேளை இன்னிக்கு simple present and simple past தான். ஆனால் அதுலேயே அவங்க கிட்ட உச்சரிப்புல மாட்டிகிட்டேன்.

Fix க்கு fixedன்னு எழுதற ஆனால் eat க்கு மட்டும் ஏன் ate? அவங்களுங்க ஏட் சொல்ல வைக்கறதுக்குள்ள பத்து தடவை திரும்ப சொல்லு திரும்ப சொல்லுன்னு கேட்டுகிறாங்க. செல் போன்ல ஒரு தடவை செக் வேற பண்ணிக்குறாங்க.

ஸ்பானிஷ்ல a வை ‘அ’ ன்னு சொல்லுவாங்க. ஆனால் ஆங்கிலத்தில் அது சில சமயம் அ வாகவும் சில சமயம் ஏ ஆகவும் இருக்கும். இதை ஏன் அப்படி உச்சரிக்கறோம்ன்னு குழப்பம். அவங்க ஆசையெல்லாம் உள்ளூர் அமெரிக்கன் உச்சரிப்பு மாதிரி அவங்களுக்கு வரனும்ன்னு ஆசை. நம்ம உச்சரிப்பு ஏதோ ஓகே மாதிரி தான் அவங்களுக்கு.

பேப்பர்ல இருக்கிறதை எல்லாத்தையும் படிச்சு காட்டி, அவங்க ஃபோன்ல ஒரு தடவை கேட்டு, பிறகு அவங்களையே திரும்பத் திரும்ப படிக்க வைச்சு போய்கிட்டே இருந்ததுல இரண்டரை மணி நேரம் மேல ஓடிடுச்சு.

Ecuadorக்காரருக்கு கொஞ்சம் வருத்தம். நிறையப் படிக்கிறேன் ஆனால் பேச வரலைன்னு வருத்தப்பட்டார். நான் நம்ம பீத்தகலசத்தைக் காட்டுவோம்ன்னு, என்னோட ஸ்பானிஷ் நோட்புக்கை திறந்து காமிச்சு, பாரு எவ்வளவு பக்கம் பக்கமா எழுதிப் பழகுறேன் பாரு, நீயும் அப்படி எழுதிப்பாரு, சீக்கிரம் வந்துடும்ன்னேன்.

அவர் தன்னோட நோட்புக்கைத் திறந்து காண்பிச்சார். நான் டக்குன்னு என் நோட்புக்கை மூடிட்டேன். யப்பா மனுசன் கையெழுத்தா அது. அச்சுல இருக்கிற மாதிரி மணிமணியாக எழுத்து. பிரிண்ட் பண்ண மாதிரி இருக்கு. முழு நோட்புக்ல பக்கம் பக்கமா கடைசிப் பக்கம் வரை எழுதியிருக்கார். ஆனால் பேச வரலை உச்சரிப்பு வரலை கிராமர் வரலைன்னு வருத்தம்.

நாடு விட்டு நாடு வந்து நாள் பூரா ஒரு சாதாரண வேலை செய்ஞ்சு, வேலை செய்யற இடத்துல அவங்களை மாதிரி தானும் ஆங்கிலம் பேசனும்ன்னு அவங்க இங்க சர்ச் வகுப்புக்கு வர்ற அவங்க உழைப்பு, உந்துதல் எல்லாம் பார்க்கும் போது, நானும் காலையில ஏழு மணிக்கு ஆபீஸ் வேலை தொடங்கி இரவு வரை இப்படி மாலை வகுப்போடு நமக்கு நாள் ஓடுது, இருப்பினும் அவங்க கமிட்மண்ட் உந்துதல் நமக்குப் பத்தலைன்னு தோனுது.

இருப்பினும் ஏதோ வாழ்க்கை ஓடுது. பல நாட்டு மக்களைச் சந்திக்கிற வாய்ப்பு, பேசும் வாய்ப்பு, அவங்க மொழி, கலாச்சாரம், பண்பாடு பற்றி அறியக் கிடைக்கிற இந்த வாய்ப்பை நினைத்தால்

வாழ்வினிது தான்.

ओलै सिरिय !

¡El presente y el pasado simples no son tan simples para todos!

நண்பர்கள் புடைசூழ ஒரு விழா

ஊரில் சின்ன வயசுல, வீட்டுல ஏதாவது விசேஷம்னா, ஊர் மக்கள் எல்லோரும் திரண்டு வந்து உதவுவாங்க. வெறும் மண்டபம் ஒரு குக் போட்டா போதும். சமைப்பவர்க்கு உதவுவதிலிருந்து, வரும் விருந்தினர்களுக்கு இலை போட்டு பரிமாறி, பிறகு இலையை எடுக்கக்கூட தயங்க மாட்டங்க.

இன்னிக்கு (மார்ச் 4) இங்கு நண்பனின் சஷ்டியப்தபூர்த்தி அவ்வாறு தான் நடந்தது. ஊர் நண்பர்கள் ஆண் பெண் எல்லோரும் திரண்டு நேற்றிரவிலிருந்தே விழாக்கோலம் தான்.

மேடை அலங்கரிப்பு, தாம்பூலம் பாக்கெட் போடுதல், அனைவரும் அமர்வதற்கு குறைந்தது 300 சேர், 150 பேர் உட்கார்ந்து ஒரே சமையத்தில் சாப்பிட டேபிள் சேர் எல்லாம் போட்டது நண்பர்களே!

நமக்கு எடுபுடி வேலை செய்ஞே பழகிப் போச்சு. கேட்கனுமா, நேற்று இரவிலிருந்தே ஓடியாடி எடுபுடி வேலை செய்து ஒவ்வொன்றிலும் பங்காற்றியதில் செம சந்தோஷம். ஆனால் அவ்வளவு ஸ்டீல் சேர்களை எடுத்துப் போட்டு வரிசையில் அடுக்கியது மற்றும் தாம்பூலம் பரிசுப் பெட்டிகள் தூக்கியதில் உடம்பு நோவ ஆரம்பித்து விட்டது.

இன்று நண்பன் மேடையில் சந்தோஷமாக சஷ்டியப்தபூர்த்தி செய்து கொள்ள, நாங்கள் வந்தவர்களுக்குப் பரிமாற ரெடியாகிவிட்டோம்.

நம்மூரில் நடப்பது போலவே உலர்ந்த இலையில் செய்த தட்டு போட்டு வரிசையாக ஒவ்வொருவரும் சாதம், வாளியில் சாம்பார், நம்மூர் ஹோட்டல் சர்வர் சட்னி சாம்பார் வைத்திருக்கும் பாத்திரம் போன்ற பாத்திரத்திலும் ஒவ்வொருவராக எடுத்துப் பரிமாற அப்படியே நம்மூரில் பார்த்த அந்த உறவினர் நண்பர் புடை சூழ நடக்கும் விருந்து போஜனத்தை அப்படியே கொண்டு வந்து நிறுத்தியதில் ஒவ்வொருவருக்கும் செம சந்தோஷம்.

சந்தேகத்துக்கு சாம்பார் கேட்பது போல ஒவ்வொன்னும் கேட்டு செமையாகப் பரிமாறினோம். கடைசியில் கால் முட்டி வலி வர, கொஞ்சம் எக்ஸைட்மண்டை நிறுத்திக் கொண்டு கடைசியாக சாப்பிட உட்கார்ந்து விட்டேன்.

கடைசியில் அவரவர் கொண்டு வந்த பாத்திரம் கரண்டிகளைக் கூட கிச்சனில் கழுவி கிச்சனை க்ளீன் பண்ணி கொடுத்து விட்டு வந்தோம்.

ஒவ்வொன்றும் ஊரின் நினைவுகளைக் கொண்டு வந்து நிறுத்தி விட்டது.

உற்றார் உறவினர் போல் நண்பனின் விழாவில் பங்கெடுத்ததில் 

வாழ்வினிது!

ओलै सिरिय ।

¡Los amigos hacen que la función sea genial!