கார் ஓட்டக் கற்றுக் கொள்ளுங்கள்

 ஒவ்வொரு நாட்டிலும் நாம் வாழ அந்த நாட்டுநிலைமைக்கேற்ப நம்மைத் தயார்படுத்திக்கனும். இது நாட்டுக்கு நாடு வேறுபடும். அப்ப தான் அந்தந்த நாடுகளில் சிரம மில்லாமல் வாழமுடியும். ஒரு வளமான வாழ்க்கையை நம்மால் அங்கு அமைத்துக் கொள்ள முடியும்.

அமெரிக்க மண்ணில் சுதந்திரமாகச் சுற்றித் திரிய முக்கியமாக இரண்டு தேவை: ஒன்னு கார் ஓட்டத் தெரியனும். இரண்டாவது எல்லாத்துக்கும் ஒரு இன்சூரன்ஸ் எடுத்துக்கனும்.

ஏன் இது இல்லாம வாழ முடியாதா? 

வாழலாம், வாழ்கிறார்கள். ஆனால் சீக்கிரமே இது நம்மை ஒரு இடத்தில் முடக்கிவிடும். ஆபத்துக்குப் பயன்படாது. இதை அநுபவித்து தெரிந்து கொள்ளலாம்.

சமீப காலமாக நிறையவே பார்க்கிறேன். இந்தியாவிலிருந்து, மற்ற அயல்நாட்டிலிருந்து, ஏன் இங்கயே பிறந்து வளர்ந்த சில கல்லூரி மாணவர்கள்/மாணவிகள் கூட கார் ஓட்டக் கற்றுக் கொள்ளாமல் இருக்கின்ற சூழ்நிலையில் தன்னை முடக்கிக் கொண்டு வாழ்கிறார்கள். இவர்களனைவரும் கல்லூரி படிப்பு முடித்து வெளியே வரும் போது கார் ஓட்டத் தெரியாமல் தடுமாறுவதை நிறைய பார்க்கிறேன். ஆகவே இவர்கள் வேலை தேடுவதும் கூட கார் ஓட்ட அவசியமில்லாத பெருநகரங்களில் மட்டுமே வேலை தேடுகிறார்கள். சிறுநகரங்களில் வேலை கிடைக்கும் போது பயணப்பட தடுமாறுகிறார்கள். வாடகை டாக்ஸி செலவு கொஞ்ச நாட்களில் சமாளிக்க முடியாது போய் விடுகிறது.

கார் ஓட்டக்கற்றுக் கொள்வதால் மிக முக்கியமாக கிடைக்கும் ஒன்று  ட்ரைவர் லைசன்ஸ். இது அமெரிக்க மண்ணில் மிக முக்கியமாகத் தேவைப்படும் ஒரு ஆவணம். அயல்நாட்டு மாணவர் மாணவியர்களுக்கு இதை இப்போது சில கட்டுப்பாடுகளுடன் கொடுக்கிறார்கள். முன்பு எந்த கட்டுப்பாடும் இல்லாமல் சுலபமாக கிடைத்த ஒன்று.

கார் ஓட்டக்கற்றுக் கொள்வது லைசன்ஸ் பெறுவது ஒன்றும் கடினமானது அல்ல. அதை கல்லூரியில் படிக்கிற காலத்திலேயே பெற்றுவிட்டால் பலவிதத்தில் படிக்கும் போதும் படித்து முடித்த பிறகும் கூட மிகமிக உதவிகரமாக இருக்கும். எனக்குத் தெரிந்து பலர் செய்யாமலிருக்கிறார்கள். வெளிநாட்டிலிருக்கும் பெற்றோர்களுக்கும் இங்கிருப்போர்களுக்கும் இதன் அவசியம் பற்றி சரிவர புரிவதில்லை. கடைசியில் அளவுக்கு அதிகமாக பணம் செலவளிக்க வேண்டியதாகி விடுகிறது. கல்லூரிப்படிப்பு முடிக்கும் மாணவர்கள் தடுமாறுகிறார்கள், மற்றவர்களைச் சார்ந்து நிற்கிறார்கள்.

பெரும்பாலான அமெரிக்காவில் வளரும் குழந்தைகள் குறிப்பாக பெண்கள் கார் ஓட்டத் தெரியாதவர்களைத் தவிர்த்து விடுகிறார்கள்.

எனக்குத் தெரிந்து இங்கு வளர்ந்த ஒரு இந்தியப் பெண் தனக்கு துணைவரைத் தேடும் படலத்தில், அந்த இளைஞரைப் பேட்டி கண்டபோது, அவர் நான் நியுயார்க் போன்ற பெருநகரத்தில் வாழ்கிறேன், எனக்கு கார் தேவையில்லை, இங்கு கார் வைத்திருப்பது சுமைன்னு சொல்ல, இந்த இந்தியப் பெண் அவருக்கு அழகாக பதிலளித்து விட்டாள்: உன்னை வாழ்நாள் முழுதும் சுமந்து செல்ல நான் உனக்கு கார் ட்ரைவராக இருக்க எனக்கு விருப்பமில்லையென்று.

இன்றைய தந்தையர் தினத்தில் இங்கு வசிக்க விரும்புவோர் தங்கள் பிள்ளைகளுக்கு அவர்கள் படிக்கிற காலத்திலேயே கார் ஓட்டவும் கற்றுக் கொடுக்கத் துவங்குங்கள்.

ஆகவே

படிக்கிற காலத்திலேயே இங்கு கார் ஓட்டவும் கற்றுகிட்டால்

வாழ்வினிது

இனிய தந்தையர் தின வாழ்த்துகள்.

ओलै सिरिय !