தஞ்சம் அடையா மான்

வில்லை வளைக்கலாம் முதுகு வளையாது
விடுபடும் அம்புக்கு இலக்கு தவறினாலும்
பாயுமிடம் தவறாது துளைக்குமிடம் ஒன்றே!

வேடனிடம் வேண்டி நிற்காது மான்
வலைவீசுபவனின் இலக்கு ஒன்றே என்றறியும்!
வில் அம்பு வேடன் வலைபற்றி யோசிக்காமல்
சுற்றியிருக்கும் அழகு சமவெளியில்
புல்லை தின்பதில் தன் வசீகரம் இழக்காது!

அவரவர் வேடத்தில் அனைவரும் கதாபாத்திரங்களே
அது வில் அம்பு வேடன் வலை மான் என தோன்றினாலும்!

தஞ்சம் அடையா மான்!