இடமறியா மணப்பெண்

இடமறியா மணப்பெண்!

தேவையற்ற இடத்தில் காலை வைத்து 

பொருந்தாத விடயத்தில் மாலை போட்டு 

விருப்பமில்லா மணப்பெண் ஆனேன்!

மண்ணில் வேரூன்றியவை 

விஷமாய்ப் போனதால்

வைக்கும் இடமெல்லாம் 

முள்செடி ஆனதடா !

முள்ளின் மீது நடக்கும் போது  

காலில் குத்தும் முட்கள் 

அகட்டி விடும் காலம் வரும் வரை 

விளையாத மண்ணில் விதைக்கும் 

பருத்தியானேன் !

முள் அகற்றத் தெரியாத 

சமூகத்தின் வேர்களைத் 

தவறித் தூக்கிப் பிடிக்கும்

கருவேல மரமானேன்!

பருத்தி முள்செடி கருவேலத்தை 

ஒன்றாய் நோக்கியதில் 

பஞ்சும் தெரியவில்லை 

எரிக்க விறகும் கிடைக்க வில்லை!